Tafidina hatrany amin’ny 100 ariary ny kapoakan’ny vary fotsy any amin’ny toerana sasany ao amin’ny kaominina ambanivohitr’i Didy iny. Noho ny haratsian’ny lalana no tena mahatonga io vidim-bary io hoy ny tantsaha. Tsy misy hevitra mihitsy hamoahana izany amin’izao fotoana izao satria tsy misy na fiara iray aza tonga any an-toerana. Ny môtô no miasa any amin’izy ireo kanefa tsy mahazaka entana akory izy ireny ary mbola sahirana mafy ihany koa raha sendra mpanamory tsy za-dalana. Tsy ny ao ihany fa saika any  amin’ireo toerana saro-dalana dia iharan’io fahambanian’ny vidim-bary io avokoa. Mahazo vahana ireo banky madinika mpampisambo-bola izay manao irony fanangonam-bokatra any ifotony irony satria izy ireo ihany no manana trano azo hitehirizana izany ka izay vidiny tiany atao eo no ataony. Tsy manan-tsafidy ny tantsaha hoy ireo mponina any amin’ireny faritra ireny satria mila vola na dia hita izao aza fa mahafatiantoka ny vidiny.

Ange R.