Teny Belambanana Andoharanofotsy no nitrangan’ny fanafihana ny fiandohan’ny herinandro teo. Mpandraharaha amin’ny fivarotana praovandy sy zanak’akoho no lasibatry ny jiolahy telolahy mitam-piadiana . Nandrasan’ireo olon-dratsy teo am-bavahady hiditra  ny tranony ilay mpivarotra ary norahonan’izy ireo tamin’ny tifi-danitra avy hatrany. Natahotra noho ny ainy ilay lasibatra ary nanaiky mora hanome izay notakian’ireo olon-dratsy. Lasa tamin’izany ny vola 8 tapitrisa ariary sy ny taratasim-bola miisa 2 ary ny fahazoan-dalana mamily fiarakodia. Rehefa tonga teny an-toerana ny zandary dia nahita taim-bala sy bala iray tsy mbola nipoaka. Mety hahafahana miroso kokoa amin’ny fanadihadiana ireo bala tavela ireo. Nampiseho ity fanafihana mitam-piadiana ity fa na dia efa voasambotra sy naiditra am-ponja aza ilay polisy nolazaina fa mpiara-dia amin’ireo mpanafika eny an-toerana dia mbola mihaodihaody eny ihany ireo andian-jiolahy. Raha iverenana dia niteraka savorovoro teny amin’ny tribonaly ny fampidirana am-ponja ilay polisy nosamborin’ny zandary ary voarohirohy ho anisan’ny mpikambana amin’ny jiolahy mpanao fanafihana mitam-piadiana eny Andoharanofotsy. Nitangoronan’ny naman’ilay polisy mantsy ny mpitory ary norahonan’izy ireo.

Dom