Rangahy iray 42 taona no hita faty tany anaty kirihitra ny 11 aogosora lasa teo tany Ambanitsena Anjozorobe. Hita tamin’ny fizahana natao azy fa nisy kiky ny lohany ary nivoaka farora-bava izy. Tsy nanamarina kosa anefa ny dokotera nanao ny fizahana na nisy namono io lehilahy io na matin’ny krizin’aretina. Tombanan’ny olona sasany mantsy fa narary tampoka teny an-dalana izy dia naka malomaloka ary nidaboka tao ka maty irery tsy nisy mpahita. Ny hafa kosa mihevitra fa mety ho daroka no nahatonga ilay ratra kely teo amin’ny handriny. Mbola misitery ity raharaha ity ary miandry fatratra ny vokatry ny fanadihadiana ny vahoaka any an-toerana. Na miezaka ny manadio ny fari-piadidiany aza ireo tompon’andraikitra sasany any Anjozorobe dia tsy azo lavina fa anisan’ny faritra mena ity distrika ity. Ankoatra an’Ankazobe dia Anjozorobe no tena mbola ahenoana halatr’omby izay sokajian’ny tompon’andraikitra ho vaky vala fa tsy asan-dahalo. Matetika ahenoana faty olona ihany koa any an-toerana araka ny tatitry ny zandarimariam-pirenena. Manomboka mampiahiahy ny mponina izao tsy fandriam-pahalemana mateti-piavy izao ka andrasan’ny vahoaka ny hisian’ny fepetra manokana hanafoanana ny vono olona sy halatr’omby any an-toerana.

Dom