Dahalo miisa 8 no nanafika ny mpiompy omby iray monina any Ambohibary, Fihaonana Tsiroanomandidy. Lasan’ireo malaso tamin’izany ny omby miisa 10 ka nanao ny fanarahan-dia ny fokonolona sy ny mpitandro filaminana miisa 2. Tratra teny an-dalana ireo dahalo nefa tsy nanaiky lembenana ka raikitra ny fifandonana. Lavo tamin’izany ny lehilahy iray tamin’ny mpanara-dia saingy tafaverina amin’ny tompony kosa ny omby rehetra. Ireo dahalo ihany koa dia tafaporitsaka avokoa. Mbola mitohy ny fanadihadiana sy ny fanenjehana ireo nahavanon-doza. Na teo aza ny famoizana namana dia nankahery ny mponina ny ezaka vitan’ny firaisankina satria nahafahana nanavotra ny fananana efa teny ampelatanan’ireo malaso. Efa manao izay vitany ihany koa ny mpitandro filaminana ary tsy manaiky lembenana mihitsy na dia vitsy an’isa sy tsy mbola ampy fitaovana aza. Heverina fa hampihena ny asan-dahalo any an-toerana izao vokatra azo izao ary hankahery ny fokonolona ho sahy hiaro tena ihany koa. ,

Dom