Mampiasa flesy miaraka amin’ny bala vita amin’ny vy notapatapahina indray ny jiolahy amin’iny lalam-pirenena faha-44 iny amin’izao fotoana izao.Tifiriny amin’iny izay fiara mandalo ka raha vao mijanona na tafajanona avy hatrany dia tonga izy ireo manafika. Fiara telo no voaroban’ny jiolahy ny faran’ny herinandro lasa teo. Ny roa fiara vaventy mpitatitra entana fa ny iray kosa mpitatitra olona. Naratra mafy ny takolakan’ny olona iray tamin’ireo fiara vaventy izay voatifitry ny flesy ka tena goaka mihitsy izany. Tsy mbola voafaritra mazava kosa hatreto ny entana very. Raha ny tranga misy no dinihina dia tsapa ho miha marefo ny fandriam-pahalemana any amin’ity lalam-pirenena faha-44 ity. Vao tsy ela akory izay ilay fiara mpitatitra nisy nandrava tao amin’ny lalan-dratsy iray dia efa izao miverina izao sahady. Misy ihany ny fepetra raisin’ny mpitandro filaminana any an-toerana, izay tsy mandefa raha tsy miaraka maromaro ireo fiara ao amin’ity lalam-pirenena ity saingy misy hatrany no voatafika.

Ange R.