Tsy namelan’ny polisim-pirenena ao Ambatondrazaka raha tsy voasambotra ny mpangaro-paosy gaigilahy roa izay efa mpanao io asa ratsy io tao amin’ny tsenan’Ambatondrazaka. Ao anatin’ny fanadiovana ny tsena ny polisim-pirenena amin’izao fotoana izao hoy ny kaomisera divizionera Ramilison Celestin. Mitaraina avokoa ny mpiantsena noho ny afitsoky ny jiolahin-tsena hoy ihany izy ka tsy maintsy mandray ny andraikiny ny polisy mijery sy misambotra ireo mpanao ratsy. Polisy tsy nanao fanamiana no nahasarona ireto jiolahy teo am-panaovana ny asa ratsiny. Misy ny paikady hapetrakay ato amin’ny polisim-pirenena amin’izao fotoana izao hametrahana ny fandriam-pahalemana maharitra ao an-tsenan’Ambatondrazaka hoy ihany ity Lehiben’ny polisin’Ambatondrazaka ity. Mbola hisy ihany koa anefa ny fametrahana fiaraha-miasa amin’ny tompon’andraikitry ny tsena hahafahana manatanteraka izany. Mijaly loatra ny vahoaka noho ny herisetran’ny mpangaro-paosy hoy izy ary tsy vitsy ireo mitondra takaitra noho ny fahaverezam-pananana amin’ny ataon’izy ireny. Miantso ny fiaraha-miasa amin’ny rehetra ihany koa anefa ny polisim-pirenena mba hifanampy amin’ny fanomezam-baovao mikasika ireo olon-dratsy. Mora ny fametrahana fandriam-pahalemana raha miara-mientana ny rehetra hoy hatrany ity kaomisera divizionera ity.

Ange R.