Raikitra ny fifampitifirana naharitra ela teo amin’ny dahalo sy ny fokonolona tany Tanandava Beroroha. Malaso miisa 35 ka nampiasa basim-borona ny 12 tamin’izy ireo no nanafika tao an-tanàna. Tsy nanaiky nolembenana anefa ny vahoaka fa niaro tena ary nampiasa basy ihany koa. Nahery vaika ny fifandonana ka tsy nahatohitra ireo mpanafika ny fokonolona. Lehilahy iray no maty voatifitra ka natahotra sy nanavotr’aina ny rehetra vao nahita izany. Lasan’ireo dahalo tamin’izany ny omby miisa 15. Tsy nanaiky anefa ny tompon’omby fa niantso zandray ary roso tamin’ny fanarahan-dia. Mpitandro filaminana miisa 8 avy ao amin’ny borigadin’i Fanjakana no nanampy ny fokonolona tamin’io. Nanao ny fanakanana sy sava hao ny lalana rehetra mivoaka ny tanàna kosa ny zandary avy amin’ny borigadin’i Tandrano. Fantatra fa rehefa tsy nahita lalan-kivoahana ireo dahalo dia navelan’izy ireo teny an-dalana ny omby rehetra ary ry zalahy kosa niparitaka ka tsy hita izay nanjavonany. Sarotra ny manenjika dahalo tsy mitondra omby satria amin’ny ankapobeny dia mahafantatra tsara ny atiala sy ny kizo rehetra izy ireny ary mahavita mifangaro amin’ny olon-tsotra ka tsy misy hamantarana azy ho olon-dratsy.

Dom