Noderain’ny maro sy herin-tsaina sy fihetsika nanavotana aina nasehon’ny mpianakavy kely y teny Isotry omaly vao maraim-be. Nirehitra ny trano tany amin’ny rihana faharoa ary tsy tafavoaka avy ao izy ireo. Hany herin’ity fianakaviana ity dia nitsambikina avy eny ambaravarankely ary natsipy hatramin’ny ankizy ary notatazana tamin’ny lambabe avy eny ambany. Avotra soa aman-tsara izy rehetra saingy ny entana no potika tsy azo noraisina. Voalaza fa fifampikasohan’ny tariby mpitondra herin’aratra no nahatonga ny firehetana tsy nampoizina io. Tranobe manara-penitra ilay may ka tsy nihitatra tamin’ny manodidina ny afo. Tonga teny an-toerana ihany ny mpamonjy voina avy ao Tsaralalàna saingy tsy nisy hevitra mihitsy azo natao hakana ireo olona tavela tao amin’ny rihana faharoa io. Hany herin’ny rehetra dia io nasaina nitsambikina sy notatazana avy eny ambany io.

Tato ho ato dia betsaka ny haintrano vokatry ny herinaratra. Raha ny fanazavan’ireo manam-pahaizana manokana momba ny elektronika sy ny elekrisite dia antony roa no mahatonga io. Voalohany dia ny tsy fahamarinan-toeran’ny tanjaky ny herinaratra avoakan’ny Jirama ka mety mahatonga fahasimba sy fipoahana amin’ny fitaovana elektrika ampiasaina any an-trano. Faharoa ihany koa dia ny tsy fahatomombanan’ny tariby mpitondra herinaratra ampiasain’ny olona. Mitobaka ary mameno ny tsena mantsy ireo tariby vita sinoa nefa tsy manaraka ny fepetra ilaina akory. Rehefa be loatra ny zavatra ampiasaina ao an-trano dia tsy mahazaka ireny tariby sinoa ireny ka mahamay be dia mitsonika ny fonony ary lasa mifampikasika avy eo. Io no mahatonga ny firehetana.

Dom