Manampatra ny heriny ny Jamami any Tsiavajavona Ankaratra distrikan’Ambatolampy. Voalaza fa manao tery vay manta ny olona hampiasa azy izy ireo. Ny Jamami moa dia fikambanana milisy sivily avy any amin’ny faritanin’i Fianarantsoa iny ary miasa amin’ny fiaroavana ny vahoaka manoloana ny asan-dahalo. Sady tsara hofana amin’ny fampiasana antsy lava no manana ody mahery hiatrehana ny dahalo izy ireo araka ny fanazavana.

Efa tonga any Tsiafajavona ny Jamami ary mampihorohoro ny vahoaka any an-toerana. Voalaza fa sady mamiravira ny tovovavy izy ireo no mangala-badin’olona ihany koa. Tsy misy sahy mandà ireo iharan’ny filan- dratsy satria  matahotra. Andro vitsy lasa izay dia nisy famadihana tany an-toerana ary nisy hira gasy natao hanafana ny lanonana. Mamo ny Jamami tamin’io fotoana io ka nanakorontana. Tsy vitan’izany fa nanao herisetra izy ireo ka nandratra olona tamin’ny antsibe ary lasa nandositra avy eo. Tsy nahalefitra intsony ny vahoaka  ary nitaraina tamin’ny mpitandro filaminana. Efa voasambotra ilay nahavanon-doza ary notanana vonjimaika. Mbola misy namany maromaro anefa mihaodihaody any an-toerana ka anaovan’ny mponina antso avo ny hanenjehana azy ireny sy handrarana azy ireo tsy hiditra ny distrikan’Ambatolampy mihitsy. Voalaza ihany koa fa hatramin’ny nisian’ny Jamami tany an-toerana dia hita fa vao mainka mirongatra be ny halatr’omby.

Dom