Vehivay iray tokony ho 30 taona eo ho eo no maty teo am-piterahana ny sabotsy 27 aogositra tolakandro, teo atsimon’ny Lisea André Resampa Antsirabe. Tsy nisy nanampo ny olona fa hiteraka ity tovovavy ity raha nahita azy nidina tao anatin’ny tatatra maina tsy misy rano, teo an-tsisin-dalana. Hay moa nihetsi-jaza izy. Ny tongotr’ilay zaza no nivoaka mialoha . Araka izany dia saro-piterahana ilay tovovavy, izy rahateo niady irery tsy nisy nanampy. Vokany, tsy tafavoaka fa tavela teo anelanelan’ny feny ilay zaza ary niafara tamin’ny fahafatesan’ilay zaza ka nanaraka ihany koa ny ain-dehibe.

Araka ny fantatra dia toa hoe avy any Ibity, distrikan’Antsirabe II no fiavian’ity tovovavy ity ary vao haingana ihany no nahitan’ny mponina azy nirenireny teto Antsirabe.
Ny polisim-pirenena sy ny Bmh moa no naka ny razana ary mety halevina eny amin’ny fasam-bahinin’ny Kaominina ny razana. Nanao rakitra moa ny olona teo amin’ny manodidina teo nahafahana nividy lamba namonosana ny razana.