Nohamafisin’ny antoko politika Tamami tamin’ny fihaonany tamin’ny mpanao gazety ny harivan’ny alahady 28 aogositra 2016, tao amin’ny Lapan’ny tanàna Toamasina renivohitra fa tsy misy afa-tsy ny  fanaovana fifidianana ny lalam-panorenana vaovao no vahaolana mahomby amin’izao krizy mianjady amin’ny vahoaka malagasy izao. Nambaran’ny filoha Samiary Florio fa ny Tamami dia antoko politika mpanohitra izay manara-maso ny raharaham-pirenena, mitsikera sy mitondra fanatsarana. Navoitran’ny Tamami fa tsy vahaolana ny fidinana an-dalam-be sy ny fanonganam-panjakana fa io soson-kevitra aroson’izy ireo io ihany no vahaolana mahomby indrindra. Mihazakazaka ny mpanohitra isan-tsokajiny hoy hatrany ny filoha fa ny Tamami dia manentana ho amin’izay heveriny ho ara-dalàna. Ny fifidianana filoham-pirenena izay hatao ny 2018 dia endrika famindram-pahefana fotsiny ihany izay manome tombony ho an’ny mpanam-bola sy ny vahiny. Koa manentana ny rehetra ny antoko, na ny vahoaka, na ny mpanao politika, sy ny hafa mba samy hiombom-peo ho amin’ny fanatanterahana izany fa izay no vahaolana maharitra sy mahomby. Raha ny fifidianana filoham-pirenena no mandeha mialoha dia hisy ny krizy, ka aoka ny malagasy samy hiray feo mba ho tombontsoa ny vahoaka fa fotoanan’ny firaisan-kinam-pirenena izao.

ZOUZOUH Toamasina