Maro ireo mpizahantany malagasy na vahiny tonga eto an-drenivohitr’i Toamasina hizaha sy hijery akaiky ny fisehoan’ny eklipsa amin’ny alakamisy 1 septambra ho avy izao. Mahasarika olona maro tokoa io eklipsa io. Ny renivohitry Betsimisaraka no anisan’ny toerana tena ahitana izany mandritra ny ora telo, manomboka amin’ny 11 latsaka kely ka hatramin’ny 2 ora tolakandro. Ho fanomanana izany dia misy ny fandraisan’anjaran’ireo mpitondra isan-tsokajiny any an-toerana ka nahatonga ny fivoriana niarahan’ireo tompon’andraikitra samihafa toy ny lehiben’ny prefektiora, ny lehiben’ny fampanoavana tribonaly ambaratonga voalohany, ny kaomandin’ny zandarimariam-pirenena, ny fibaikoana ny tafika, ny kaominina, ny boriboritany sy ny sefom-pokontany, ny departemanta minisiterialy tamin’ny minisitry ny filaminam-bahoaka, Anandra Norbert, izay natao tao amin’ny hotel “Splendide” ny tolakandron’ny alatsinainy 29 aogositra 2016. Mahasarika mpizahantany maro tokoa ny eklipsa  ka misy ny fepetra tsy maintsy arahina, hoy ny lehiben’ny prefektiora. Nofaritany mazava tsara fa manomboka amin’ny 11 ora latsaka ka hatramin’ny 2 ora any ho any ny faharetan’ny fisian’ny eklipsa eto Toamasina. Ho an’ny lehiben’ny fampanoavana tribonaly ambaratonga voalohany Toamasina indray, dia hisy ny fepetra hapetraka amin’io eklipsa io mba hitandrovana ny fandriampahalemana eto Toamasina sy Fenoarivo Atsinanana. Na dia ahitana tsara io eklipsa io aza i Toamasina dia hisy ny orana hirotsaka araka ny filazan’ny sampan-draharaha mpijery ny toetrandro.

ZOUZOUH Toamasina