Ankehitriny, tsy kely lalana ny ratsy ka izay tsy mailo dia voany. Betsaka ireo asan-jiolahy heno etsy sy eroa na maro aza ireo polisy miparitaka, mitety ny elankelan-trano dia vitan’ireo mpanao ratsy ihany ny teti-dratsiny. Ny 31 aogositra, tao  Ankadilalana fokontany Andranovao, tamin’ny 12 ora sy 30 minitra iny tolakandro iny, dia nisy roalahy nangala-bola. Teny Ambohimangakely tao amin’ny fivarotan-kazo no nitranga ity asa ratsy ity. Mody nilaza ireo olon-dratsy fa haka ny akanjon’ny rahalahiny izay marihina fa mpiambina tao amin’ilay fivarotana teo aloha. Noho izany, tsy taitra ilay tompon-trano fa namoha ilay varavarana. Akory ny hatairan’ity farany raha vao tafiditra ireo roalahy fa avy hatrany dia nidaroka sady nandromba ny vola lafo rehetra mitotaly 4 095 000 ariary. Rehefa vita ny asa ratsin’izy roalahy, avy hatrany dia nandositra izy ireo. Vokany, naratra mafy tamin’izany i Tefinjanahary Tanjoniaina ary nentina notsaboina eny amin’ny Hjra. Niezaka avy hatrany nanao ny fikarohana ny zandary avy ao amin’ny brigady Ambohimangakely saingy efa tsy tratra ireo jiolahy.

Volana S.