Efa manakaiky ny vanim-potoanan’ny maintany isika izao na dia mbola mangatsiaka aza aloha aty ampovoan-tany, indrindra ny eto Iarivo ka mipaka hatrany Fianarantsoa. Raha ny manakaiky ny morontsiraka kosa, indrindra ny ilany andrefan’ny nosy dia efa maimaina tokoa ny rivotra mitsoka ary mitoetra mandritra ny andro sy ny alina ny hafanana. Fotoana toy izao tokoa no manomboka mirehitra tsy an-kijanona ny afo. Voamarina izany raha mihazo ny lalam-pirenena fahefatra iny satria dia ahitana doro tanety maromaro ihany mandrapahatonga aty an-drenivohitra. Toy izay koa raha manaraka ny arabe mianavaratra ka mihazo ny lalam-pirenena fahenina. Ho an’ny mponina any amin’iny faritry Sofia iny dia fotoana ihany koa izao amin’ny tokony hitandremana amin’ny fiparitahan’ny afo haingana satria mitsoka mafimafy ihany ny rivotra avy any an-dranomasina any no sady lemaka no betsaka amin’io faritra io.

Izay tokoa no nitranga tao amin’ny fokontany Betangerina, ao amin’ny kaominina ambanivohitra Anjalazala, distrika Antsohihy satria trano miisa 38 tafo be izao no may tao an-toerana. Vokany, olona 60 be izao no lasa tsy manan-kialofana, tsy manana hanina hatokona ary tsy manana lamba hotafiana intsony afa-tsy ny eny an-kodiny. Nidina tany an-toerana ny ben’ny tanànan’Anjalazala niaraka tamin’ny zandary mba hanao ny fanadihadiana rehetra mikasika ity raharaha ity satria dia fantatra fa niainga tao amin’ny tokantrano iray ny afo izay niavian’ny loza ny talata faha-30 aogositra lasa teo tamin’ny 3 ora hariva.

J.L.R