Manjaka ny dahalo any amin’iny distrikan’Ambatofinandrahana iny ary efa ela no nisian’izany. Dahalo maromaro nitondra basy kalaky sy basy lava no nanafika tao Ankisira, fokontany Ambalakinagna, ao amin’ny kaominina ambanivohitra Amborompotsy ka nangalatra omby 26 isa. Ny zoma 2 septembra lasa teo no nisehoan’izany halatr’omby izany ka rehefa nandre ny fahavoazana ny kaomandin’ny kaompania tao Ambatofinandrahana dia nandefa zandary nanao ny fanarahan-dia niaraka tamin’ny fokonolona. Ny androtr’io ihany dia nisy ny fifandonana, dahalo miisa 11 no maty ary tafaverina avokoa ireo omby nangalarin’izy ireo. Ankoatra izany dia basy lava vita gasy 3 miampy cartouche 3 ihany koa no tratra. Araka izany, masiaka dia masiaka ny dahalo any amin’ny faritra Amoron’i Mania any kanefa tsy misangy ihany koa ny zandary sy ny fokonolona. Ity kaominina ambanivohitra voalaza etsy ambony ity dia itrangan’asan-dahalo matetika tokoa ary dia mitondra faisana mihitsy ny mponina any ambanivolo any.

J.L.R