Fitaovam-pitaterana iray mbola nahazatra ny mason’ny mpandeha folo taona lasa izay irony « Super Goelette » vitan’ny orinasa Renault et Saviem irony. Raha nandinika ny maro dia lasa voasolon’ny fiara mazda izy ireto ary ity farany indray izao dia voailikilika amin’izao fotoana izao satria ny « sprinter » indray aloha izao no malaza.

Ho an’ny mponina avy aty an-drenivohitra dia nahamenatra azy ireto ihany ny mitaingina ireny “super” ireny no sady amin’izay koa mbola tery dia tery ny seza ao anatiny satria ataon’ny mpamily mpanampy enina eo amin’ny laharana iray. Fa ny tena tsy nitiavan’ny maro azy dia be ihany koa ny lozam-pifamoivoizana nataon’ity karazana fiara ity ary tsaroana ihany koa fa mitabataba be ny radio fampiasan’ilay mpamily somary mivilan-tsatroka izay. Izany tokoa mantsy ny lamaody tamin’izany fotoana izany. Ankehitriny, efa azo isaina amin’ny rantsan-tanana ny fiara « super goelette » miasa ary matetika izy ireny dia mampitohy ny any ambanivohitra manodidina an’Antananarivo saingy lalan-dratsy na ihany koa lalan-tany no ifandraisana. Tsy mahagaga ihany izany satria azo lazaina fa efa lany lamaody ity fiara ity ka be no tsy tia mandeha aminy sady ny ao anatiny rahateo efa tsy dia misy intsony ny « confort » tadiavin’ny mpandeha amin’izao fotoana izao. Ho an’ireo mbola manana azy kosa anefa dia azo lazaina fa efa lanin’izy ireo tsianjery ny fikarakarana ara-mekanika azy ary dia an-kavitsiana foana sisa no manary an-dalana. Io izany izao no 4×4-n’ny tantsaha sy ny tambanivohitra!

J.L.R