Tsy vaovao amin’ny olona ny mandre lozam-pifamoivoizana amin’ny lalana RN1. Maro ny loza efa nitranga amin’iny faritra iny, noho ny fandehanana mafy, ao koa ny tsy fitandremana. Tokony efa mba ho mailo anefa ny rehetra fa ny ratsy tsy kely lalana. Ny tampoka anefa, hono, tsy mahalehilahy ka rehefa hitranga izay tokoa ny tsy ampoizina dia miafara amin’ny fahafatesana. Ny 5 septambra  tamin’ny 10 ora sy 10 minitra hariva, nodomin’ny fiara marika mazda iray ity zazalahy kely vao 10 taona monja. Maizina tokoa mantsy ny alina, tsy misy koa ny jiro manazava ny lalana, dia izao nitranga izao ny loza. Saika niampita arabe tampoka ilay zaza ary tsy afa-nanohitra ilay mpitondra fiara izay avy ao amin’ny koperativa Fitsitsi. Mafy tokoa ny dona ka maty tsy tra-drano ilay zazalahy. Noho izany tranga izany, dia niezaka namonjy ilay ankizy, izay nanatri-maso fa izao tsy tana izao ny ainy. Ny zandary avy ao amin’ny Borigady Miarinarivo no manao ny famotorana ary notanana vonjy maika ilay mpamily sy nanaovana fanadihadiana.

Volana S.