Ankehitriny dia aleon’ny fokonolona vonoina ireo mpanao ratsy toy izay aterina eo am-pelatanan’ireo mpitandro filaminana satria tsy mijanona ela akory izy ireny dia tafavoaka ary afaka madiodio aza ny ankabeazany. Jiolahy raindahiny indray mantsy no maty tsy tso-drano rehefa niharan’ny hatezeram-bahoaka tamin’ny faran’ny herinandro lasa teo tany Maromitety Andonabe Kaomina Marolambo, Distrikan’ Anosibe An’ ala. Araka ny vaovao azo dia mitam-pihadiana ity lehilahy iray ity ary nanafika niaraka tamin’ny namany dimy lahy hafa. Tokantrana mpanangom-bokatra iray no lasibatr’ireto farany izay nivimbina antsy, famaky ary lefona avokoa. Nisy noho izany ny fifanoherana teo amin’ireo jiolahy sy ny tompon-trano ka nahatonga fikasihan-tanana mahery vaika. Nokapain’iray tamin’ireo olon-dratsy ny lohan’ilay raim-pianakaviana ka naratra mafy ity farany noho izany. Nahare ny antso vonjy sy ny kotaba anefa ireo fokonolona ka nirohotra namonjy ilay trano. Tra-tehaka avy hatrany teo am-panaovana ny asa-ratsiny izy ireo ka dia nifampisamboran’ny fokonolona erakin’ny tanana. Ny iray tamin’izy ireo ihany nefa no tratra ka niharan’ny fitsaram-bahoaka. Ora vitsy taty aoriana kosa dia tratra ireo efatra ambiny ka naterin’ ny fokonolona tany amin’ ny Zandary.

T.A.