Tranga tsy dia faheno loatra izy ity manerana ny nosy satria any ambanivohitra any, mbola kely ny ankizy dia efa za-dalana ary mahafantatra izao lalana manivaka rehetra izao hahafahana mamonjy ny tanàna. Tsy izay anefa no nitranga tany amin’ny fokontany Ambohimanarina ao amin’ny kaominina ambanivohitra Antanetibe, any Anjozorobe any. Voalaza tokoa mantsy fa tsy hita nanomboka ny alahady 4 septambra lasa teo ny ankizy telo dia i Felana, 14 taona sy Soavola 6 taona ary i Vanya 5 taona. Naterin’ny renim-pianakaviana iray teny an-tsasa-dalana izy ireto mba hamonjy ny tranony avy satria tokoa zanak’olona samihafa monina amin’ny tanàna antsoina hoe Ambodibonara izy ireto, izay ao anatin’ny fokontany sy kaominina voalaza anarana etsy ambony tamin’ny 4 ora hariva, io andro io. Nanomboka teo anefa tsy hita intsony izay nalehan’ireto zaza kanefa efa somary lehibebe ihany ilay zokiny indrindra amin’izy ireo. Ny zandary ao amin’ny poste avancé Antanetibe Anativolo no manao ny famotorana ary mitohy ny fikarohana hatramin’izao fotoana izao.

Raha tsiahivina dia toerana somary avoavo ihany iny distrikan’Anjozorobe iny ary araka ny maha-aty afovoan-tany azy dia mangatsiaka tokoa, indrindra amin’ny alina sy ny hariva ary ny maraina. Efa ho andro maromaro izy ireto no tsy hita ary izay no mahakely finoana ny maro raha toa tokoa ka very ireto zaza ireto. Etsy andanin’izay, somary mifanalavitra ihany ny tanàna any ambanivohitra rehetra any ka tsy maintsy mandeha an-tongotra ora vitsivitsy mihitsy izay vao mahita trano ialofana. Ny tsy fandriam-

pahalemana ihany koa dia manjaka manerana ny faritra rehetra ary tsy misy toerana izay azo lazaina fa milamina afa-tsy ny lapam-panjakana angaha.

Araka izany, feno fanahiana tokoa ny ray aman-drenin’ireto ankizy ireto amin’izao fotoana izao.

J.L.R