Na somary tsy dia tsara loatra aza iny lalam-pirenena 5a iny, izay mampitohy an’i Toamasina amin’ny faritra avaratry ny faritany, izany hoe mipaka hatrany Maroantsetra ka mandalo an’i Soanierana Ivongo, dia misy ihany ireo mpamily milaza azy ho za-dalana ka mandeha mafy hatrany. Ny tsara homarihina amin’iny lalana iny aloha hatreto dia hatreo Soanierana Ivongo ihany no voarakotra tara. Raha iverenana ny zava-nitranga tao Foulpointe dia teo anoloan’ny fivarotana Telma shop tao amin’ity tanàna ity no niseho ny lozam-pifamoivoizana. Ity toeram-pivarotana ity dia mazava ho azy fa ifamezivezen’ny olona maro tokoa satria be mpanjifa ny vokatra Telma, indrindra fa mbola betsaka ireo maka rivotra any amin’ity toerana ity amin’izao fotoana izao. Nirimorimo avy any ary ity fiara mazda iray ity ary nahavoadona zazalahy kely iray izay vao efatra taona monja rehefa nandalo ny toerana voalaza etsy ambony. Naratra mafy tokoa ilay zaza ary tsy maintsy nalefa any amin’ny toeram-pitsaboana tao Foulpointe ihany aloha. Ilay mpamily kosa tsy maintsy notazomin’ny zandary ao amin’io tanàna io ihany hatao famotorana.

J.L.R