Tokony hojerena ny faritra iasan’ny mpanjono sy ny fetra ambany indrindra amin’ny harato ampiasain’izy ireo. Ny zoma 09 septambra 2016 teo, tany amin’ny fokontany Antsanitia, kaominin’i Belobaka, distrikan’i Mahajanga faharoa dia nisy ny fizarana karatra maha matihanina tamin’ireo mpanjono miisa 75. Natao izao hetsika izao mba hahafahana mamantatra marina ny tena isan’ny mpanjono sy ny isan’ny lakana miasa ary mba hirosoana amin’ny sehetra matihanina. Miisa 75 ireo nahazo ny karatra maha mpanjono ary miisa 53 kosa ny lakana nahazo laharana izay nataon’ny fikambanana Ezaka, Fipata, Fimpamy.  Ity hetsika ity dia fandaharan’asa ny ministeran’ny harena anaty rano sy ny jono  izay manerana ny Nosy. Teo anelanelan’ny taona 2012 sy 2013 dia miisa iray hetsy ny mpanjono nahazo karatra ary dimy alina kosa ny lakana nampiasain’ izy ireo.  Ny faritra Boeny no mitana ny laharana faharoa amin’ny isan’ireo mpanjono eto Madagasikara. Any Mitsinjo any Soalala kosa indray no hanohizana ny hetsika.

S.A.