Tsy mampilaza tokoa ny loza rehefa hoavy ka mila malina hatrany isika mpandeha an-togotra eny amin’ny sisin’ny arabe. Vehivavy mpandeha an-togotra roa no noteren’ny fiara « Golf » iray tetsy Ampahibe, teo amin’ny toerana antsoina hoe « croisement de la mort » omaly talata maraina. Teto an-drenivohitra mifanitsy amin’ny secmo no nitranga ny loza.  Izany hoe avy aty amin’ny faritra misy ny « chapelle militaire ity fiara ity » manoloana ny Kianja ny Betongolo sy ny faritra misy ny toby miaramila. Tsy nampoizina fa raha sendra nandeha iny izy mirahavavy no nirifatra avy any ity fiara ka tany amin’izy ireo no nifatratra nanindry azy ireo teo amin’ny tamboho vatobe. Raha ny loharanom-baovao dia tapaka hisatra ity fiara golf ity izay vehivavy no nitondra azy. Eo koa ny milaza fa niala « moto » no antony nahatonga ny loza. Voavonjy ara-potoana teny amin’ny hopitaly moa izy ireo. Tsy fantatra kosa ny mikasika ny niafaran’izy ireo fa ny azo antoka dia voa mafy raha ny ratra nahazo ary ahiana mihitsy ny fahatapahana eo amin’ny tapany ambany amin’ireto olona niharan-doza ireto.  Tsy nisy kosa ny aina nafoy nandritra ny fotoana nitrangan’ny loza raha  ny loharanom-baovao hatrany.  Araka ny anaran’ny toerana dia tsy vao izao no nitrangan’ny loza toy izao io toerana io ka tokony hitandrina sy ho malina hatrany na ny mpandeha an-tongotra na ny mpamily fiarakodia mindrana sy mampiasa matetika iny lalana iny.

Safidy Andrianina