Tamin’ity taona 2016 ity dia Toamasina indray no nampiantrano ny fihaonam-ben’ny fanabeazana katolika manerana an’i Madagasikara. « Harena ny harena raha mamokatra ary mamokatra ho an’ny besinimaro » ny lohahevitra  tamin’ity fankalazana ity. Sorona Masina lehibe no nanombohana ny fotoana, ary nitarika izany ny Arsevekan’i Toamasina, Tsarahazana Désiré. « raha mahery aho dia mahery araka ny Evanjely, raha resy aho dia resy araka ny Evanjely, ary raha mitomany  dia mba mitomany araka ny Evanjely. Izany hoe, toe-tsaina ara-pinoana no entina miatrika ny fifaninanana sy ny fifaneraserana rehetra ». Fanontaniana nipetraka ny hoe : «  tena miaina  amin’ny mahasekoly katolika azy ve ny mpianatra amin’ny sekoly katolika? Ary misy fanantenana ve ao anatin’ny fiombonana amin’ny maha samy Malagasy ? »

Taorian’ny Sorona Masina dia niroso avy hatrany tamin’ny fifaninanana ara-panatanjahantena ireo mpianatra sy ny mpanabe avy amin’ny Diosezy ary samy nahatonga solontena avokoa ny avy amin’ny lafivalon’ny Nosy. Isan-kariva dia nisy ihany koa ny hetsika ara-kolontsaina nentina nanandratana ny harena isam-paritra. Araka ny nambaran’i R.P Ranaivoson Jules, Tale Nasionalin’ny fanabeazana katolika na Dinec (Directeur national des écoles catholiques) dia “tanjon’ny herinandron’ny sekoly katolika sy ny fanamarihana ny androm-pirenena ho an’ny fanabeazana katolika ny fifanakalozan’ny mpianatra rehetra manerana an’i Madagasikara ny maha izy azy ny sekoly katolika toy ny “fandalinam-pinoana” sy ny “Fibeazana miaina sy mitia” na EVA. Rehefa mahazo ireo fandaharam-pianarana ireo ny sekoly katolika dia mitovy ny zava-bita amin’ny fanatratrarana ny tanjom-panabeazana na lafo na mora ny saram-pianarana.” Ka manoloana izay fahasamihafana izay dia manohy ny ezaka ny foibe nasionalin’ny fanabeazana katolika (Dinec) sy ny foiben’ny Dioseziana hampitovy lenta ny sekoly rehetra manerana ny Nosy.

Safidy Andrianina