Tsy milamina ny tany ankehitriny!  Mahazo vahana ny mpanao ratsy hanao izay tiany amin’ny fihetsika feno fahalotoana. Ny tsy fahazakana ny zava-misy eo amin’ny fiarahamonina tokoa mantsy no miteraka haratsiam-panahy diso tafahoatra, toy ny famonoan’olona izay tsy fantatra mazava hoe valifaty ve sa fialonana sa tsy fahazakana ny fahombiazan’ny hafa, hany ka dia atao mihitsy izay fomba rehetra mety hahataperan’ny ainy. Dia toy izay tokoa ny zava-nitranga teny Antanambazaha, distrikan’Ambato Boeny, kaominina ambanivohitr’Ambondromamy, fokontany Dudit iny raha toa ka lehilahy 33 taona, izay fantatra amin’ny anarana hoe Randrianasolo Jean Fidèle, monina ao Morafenokely no hita faty nisy namono ny alin’ny 13 septambra lasa teo tokony ho tamin’ny 11 alina. Tamin’ny fomba feno habibiana tokoa no namonoana an’io lehilahy io satria dia nahitana diam-pamaky 07 teo amin’ny lohany ary mbola tsy fantatra hatreto hoe iza tokoa no nahavanin-doza toy izany. Raha vantany vao nahare ny trangan-javatra ireo zandary dia nidina teny an-toerana avy hatrany hanadihady, niaraka tamin’ny dokotera avy tao amin’ny Csb II hanao fitiliana ny razana. Ny polisy ao amin’ny kaominina ambanivohitra no misahana ny raharaha amin’izao fotoana izao.