Isan’ny faritra mena amin’ny halatr’omby sy ny asan-dahalo ihany koa iny distrikan’Ankazobe iny kanefa 100 kilometatra monja any andrefan’ny renivohitr’i Madagasikara no misy azy. Marina aloha fa midadasika ny distrika kanefa na izany aza tsy lavitra loatra ny toby misy ireo miaramila sy zandary ary polisy maro izy. Tranga hafakely ihany koa anefa no nitranga tamin’io toerana io, tao amin’ny fokontany Andranomiely Atsimo ao anatin’ny kaominina ambanivohitra Andranomiely avaratra satria dia nisy ny fanafihan-dahalo nitranga. Efatra ireo malaso ireo izay nitondra basy kanefa omby tokana ihany no nokendren’izy ireo. Lasan’izy ireo tokoa ny omby saingy namela takaitra ho an’ny tompon’ny omby ny … “fitsidihana” nataon’ireto dahalo ireto satria dia ny fitombenan-drangahy tompontrano no nokendren’ireto farany ary voany tokoa. Naratra mafy araka izany ny tompon’omby. Rehefa nampandrenesina kosa ireo zandary tao amin’ny poste avancé-n’Andranomiely avaratra dia nanao ny fanarahan-dia niaraka tamin’ny fokonolona. Ny alatsinainy faha-12-n’ny volana septembra teo tamin’ny valo ora alina no nitranga ity asan-dahalo ity.

J.L.R