Ela nitoratorahana ka nahavoa mason’angatra hoy ny fitenenana. Mpanendaka roa lahy efa ikoizan’ny mponina eny amin’iny Ampitatafika sy ny manodidina iny no tratra ambodiomby teo am-panaovana ny asa ratsiny ny alakamisy lasa teo tokony ho tamin’ny 8 ora maraina. Tsy mifidy toerana anendahana sy lera tokoa izy roa ireto satria na any anelakelan-trano na eny an-tsena eny na eny amin’ny fiandrasana fiara fitateram-bahoaka ireny aza dia mamely tsy misy hambahamba ry zalahy. Ny manodidina kosa tsy sahy miteny na manondro molotra satria araka ny vaovao voaray dia mandrahona ny hamono ho faty ry zalahy, antony matonga ny olona mangina sy mijery fotsiny na dia mahita ny asa ratsy ataon’izy ireo aza izany. Teo am-panendahana mihitsy anefa i René sy Faly (anaran’ireo tonta kely roalahy) no sendra ny patsa iray tsy omby vava satria tratra soa aman-tsara ka nifanenjehan’ny fokonolona. Mbola nitady hirika hitsoahana ihany anefa ry zalahy saingy tsy afa-nanohitra intsony satria voaray tamin’ny vozon’akanjony araka ny fitenenana. Araka ny vaovao azo dia efa saika niharan’ny fitsaram-bahoaka izy ireo satria voadaroky ny sasany tamin’ireo nanenjika vao hany voasambotra. Nisy anefa ireo izay nanohitra izany ka voatery niantsoana mpitandro filaminana. Natolotra ny fampanoavana teo Anosy omaly i René sy Faly ary efa mandeha ny fanadihadiana rehetra amin’izao fotoana izao.

Ra Tax.