Tao an-tampon-tanàna mihitsy no nitrangan’ny fanafihana ary mpampianatra ilay voatafika. Ny alahady alina hifoha alatsinainy no nisian’ny fanafihana ka am-polony ireo mpanafika izay nirongo basy. Tsy nitsaitsaika izy ireo fa nahery fiavy satria sady nanapoaka basy tsy an-kijanona no nihorakoraka ary nitsoka kiririoka no sady nandefa radio mafy dia mafy ihany koa hampihorohoroana ny mponina. Nisy ihany ny andrimasom-pokonolona saika hanohitra saingy noho ny hery tsy mitovy sy ny fitaovam-piadiana tsy mifanentana dia tsy sahy fa nandositra ireo tompon-tanàna. Tao anatin’ny tabataba tsy nifandrenesana no nakan’ireo dahalo ny omby rehetra tao am-bala izay miisa 13. Nihorohoro ny rehetra satria tena tamin’ny diavolan’ny  misasak’alina mihitsy no nisehoan’io fanafihana io. Ny ampitso maraina vao natao ny fandaminana ka roso tamin’ny fanarahan-dia ny zandary sy ny dinabe any an-toerana.  Hafa kely mihitsy ity fanafihana ity ary nasehon’ireo dahalo fa tsy matahotra na iza na iza izy ireo ary tamim-pahasahiana sy tamim-piravoravoana no nanatanterahany ny halatra nataony. Mihorohoro ny mponina any an-toerana sao ho lasa mateti-pitranga ny toy izao ka miantso ny tompon’andraikitra mahefa mba hametraka lamina maty paika hisorohana ny mety hiverimberenan’ny fanafihana avy amin’ny dahalo.

Dom