Tezitra sy mimenomenona ny mponina eny amin’ny boriboritany fahatelo noho ny afitsoky ny orinasa Saga na “Société d’arts graphique d’Antananarivo”. Misy andian’olon-tsy fantatra manaparitaka ny “autocollant” famantarana io orinasa io mantsy tato ho ato. Ny tena mampitaraina ny mponina dia apetak’ireo olon-tsy fantatra ireo amin’ny fiara ilay “autocollant” izay tsy mety miala mihitsy fa tsy maintsy kikisana vao afaka. Izany hoe tsy maintsy misy kiky ary simba ny lokon’izay fiara voan’io “autocollant io”. Misy laharan’antso an-tariby eo amin’ilay autocollant io saingy maneno fotsiny ilay izy fa tsy misy mandray rehefa antsoina. Tsy fantatra noho izany na olona voakarama na ihany koa tena migafy fotsiny ny mametaka izany eny amin’ny fiaran’olona. Ny azo antoka aloha dia tsy maintsy tao amin’ny orinasa no nivoaka ireny autocollant ireny ary tompon’andraikitra feno amin’ny fiparitahan’izany io orinasa io. Anjarany ny manara-maso ny zavatra mivoaka ao aminy.