Mampitandrina hatrany ireo rehetra manao asa fanorenana tsy manara-dalàna ny Kaominina Antananarivo-Renivohitra fa tsy hilefitra amin’ny fampiharana ny lalàna velona.    Trano fivarotana enta-madinika iray teny Ampasanimalo (Boriborintany Faharoa) no narodan’ny Kaominina Antananarivo-Renivohitra androany tamin’ny 6 ora sy sasany maraina.   Efa nisy ireo dingana samihafa nolalovana talohan’izao, toy ny fampakarana ny raharaha teny amin’ny fitsarana, izay niafara tamin’ny faharesen’ny tompon’ny trano. Nampiomanina tapa-bolana mialoha sy 24 ora mialohan’ny fandravàna ny tompon’ny trano vao nandray izao fepetra izao ny kaominina. Olona 25 avy ao amin’ny foiben’ny asa vaventy (Direction des Travaux Publics/Cua) no nisahana ny asa, natrehin’ny Vadintany, Polisy Monisipaly sy Polisy Nasionaly maromaro. Izany dia fampiharana ny Didim-pitondrana Monisipaly Laharana 755-CUA/CAB.16 tamin’ny 21 Septambra 2016.  Tsy misy rihana ny trano, 4 metatra ny halavany, 2 metatra ny sakany. Noho ity trano ity naorina ambony lalam-bahoaka no antony nandrodanana azy.  Tsiahivina fa ny lalàna mitondra ny laharana 2015-052 tamin’ny 3 Febroary 2016 mikasika ny fanajariana ny tanàn-dehibe sy ny toeram-ponenana, no manome fahefana ny Ben’ny Tanàna hamoaka didim-pitondrana monisipaly mikasika ny fandrodanana trano miorina ambony lalam-bahoaka.

Safidy Andrianina