Iaraha-mahalala fa araka ny fehezan-dalana manan-kery dia sokajiana ho heloka bevava ny halatr’omby. Raha zohina eo amin’ny lafiny ara-kolontsaina anefa ity resaka halatr’omby ity, dia tsy tokony ho hadinoina fa azo kilasiana ho fomba amam-panaontsika malagasy ihany izy ity teo aloha ary mbola hita taratra izany hatramin’ny faramparan’ny taona 1975. Iaraha-mahita anefa

ankehitriny fa tanterahina  amin’ny fomba feno habibiana izany, ka very tanteraka ny endriny fahiny amin’ny maha kolontsaina azy. Ny alakamisy lasa teo tamin’ny iray ora tolakandro dia dahalo 20 lahy nirongo fitaovam-piadiana mahery vaika no nanafika tao amin’iny  toerana iray antsoina hoe Andranimiely, fokontany Mazamiepo ao amin’ny faritra Bongolava iny. Teo am-pangalarana ireo omby izy ireo no tra-tehak’ireo 8 lahy mpiandry omby saingy nataon’ireo dahalo sambo-belona ireto farany ka tsy afaka nanao na inona na inona. Nataon’ireo mpanao ratsy takalon’aina noho izany ry zalahy ary  nizotra nianatsimo ny dian’omby.

Tafaporitsaka anefa ny iray tamin’ireo takalon’aina, ary ity farany no nitantara fa misy tafika 02 manao « tenue de combat » sy mitondra basy kalaky amin’ireo dahalo. Tsy fantatra mazava noho izany raha tena mpitandro filaminana no miray tsikombakomba amin’ireo dahalo na hoe fitafiana fotsiny no nisaloran’izy ireo mba  hanosoram-potaka ireo mpitandro filaminana fotsiny. Rehefa nampandrenesina ireo tompon’omby dia zandary 4 avy ao Bemahatazana sy Mazamieno no manao ny fanarahan-dia miaraka amin’ny fokonolona. Nisy noho izany ny fifandonana tamin’ny mpanara-dia sy ireo dahalo ka azo avokoa ireo takalon’aina 7 ambiny. Ny mampalahelo anefa dia mbola any am-pelantanan’ireo dahalo avokoa ireo omby. Mitohy hatrany ny fanarahan-dia.

Ra Tax.