Tafiditry ny mpangalatra solika ny eo anivon’ny seranan-tsambon’i Toamasina. Olona 9 lahy no tratra ambodiomby saika hangalatra gazoala 1640 litatra afakomaly alina. teo ampikasana ny hamoaka izany izy ireo no saron’ny mpiambina.

Tsy nisy afa-nihetsika fa voasambotra avokoa ary notanana ao amin’ny borigadin’ny seranan-tsambo ireo jiolahy ireo.  Tsy mahagaga ny tranga toy izao raha ny zava-misy ankehitriny no jerena satria efa tena sahirana amin’ny fiakarana tsy ankijanona eo amin’ny vidin-tsolika ny mpandraharaha malagasy.

Mazava ho azy fa ireo mpitatitra no tena mitady sy sahy mividy gazoala halatra toy izao. Na eto an-drenivohitra aza dia efa tongan’ny mpisoloky mitety tranon’olona sy manantona izay mpamily mihatsona eny an-dalana sao hividy gazoala amin’ny vidiny mora kokoa raha oharina amin’ny eny amin’ny toby fivarotan-dasantsy ara-dalàna. Mila mailo ihany anefa ny rehetra  manoloana ireny solika halatra ireny satria sady tsy ara-dalàna no ihany koa tsy azo antoka fa mety hanimba ny fiara. Tokony hahatonga saina ny tompon’andraiki-panjakana ihany koa ny tranga toy izao satria tena lafo loatra ny vidin-tsolika eto amintsika ka mampanitatra ny sain’ ireo olon-dratsy hitady hirika hividiana mora.

Dom