Naka olona indray ny rano tany Toamasina. Tovolahy vao 20 taona monja no natelin’ny rano rehefa nandro teny amorony. Mponina ao Tanambao 5 izy io ary karazan’ny efa zatra misaika eny. Efa manao ny fikarohana ny tompon’andriakitra isanisany saingy tsy mbola hita ny razana hatramin’ny fotoana nanoratana. Amin’ny loza an-dranomasina toy izao dia maro ny olona no miresaka ny fisian’ny hery tsy hita maso misintona ireny olona lasan’ny rano ireny. an-jatony, mba tsy hilazana hoe an’arivony mantsy ny olona misaika sy milomano eny amin’ny ranomasina nefa dia tsirairay hatrany no lasan’ny rano. Maro rahateo ny fomba amam-panao tsy maintsy hajaina amin’ny rano eto Madagasikara. Anisan’ireny ny tsy fihinanana na fitondrana kisoa na tongolo gasy, ny hafa kosa toaka, sns…Mbola manan-kery sy manan-danja amin’ny malagasy ny finoana toy izany ary tsy itadiavana fanazavana siantifika fa eken’ny maro. Tsy misy maharatsy ny mitandrina ny fomban-tany rahateo satria harena ara-kolotsaina izy ireny.

Dom