Faritra Boeny – Nilefa ireo jiolahy rehefa nifanena tamin’ny zandary
Fanaon’ireo jiolahy rehefa avy mangalatra omby ny mandeha mitady toerana tsy maro mpahita mba hanafenana ny omby azo. Matetika mantsy, araka ny vaovao azo avy amin’ireo mpitandro filaminana dia mandeha manafika toerana maromaro ireo malaso ary avagongon’izy ireo amin’ny toera iray aloha ny omby halatra vao hentin’izy ireo varotana any amin’ny toerana tsy voafaritra. Efa misy mantsy araka ny vaovao azo olona sy mpanjinjara mandray ireny omby halatra ireny izay entina amidy aty an-drenivohitra. Ny alakamisy lasa teo dia dahalo maromaro tra-maraina no nifanena tamina zandary miisa 4 izay nanao fisafoana kizo tao amin’ny toerana iray antsoina hoe Andinilatsaka, fokotany Marosakoa ao amin’ny faritra Boeny, Distrikan’ny Marovoay. Raha ny filazan’ireto farany dia avy nangalatra omby mihitsy ireto dahalo ireto no sendra azy ireo ary tsy nanam-po hifanehatra amina mpitandro filaminana ry zalahy satria toerana tena kizo tokoa ity voalaza ity. Vao nahita ireto malaso moa ireo zandary dia avy hatrany dia namahana ny basy teny ampelatanany ka rehefa nahita izany ireo olon-dratsy dia nitady lalana hitsoahana avy hatrany. Navelan’izy ireo teo an-toerana noho izany ny omby 16 izay mbola tsy fantatra mazava ny tompony. Voatery nandray fepetra araka izany ireto zandary ka nampidirina fourrière ao amin’ny commune Ankazomborona ireo omby tratra, ary mbola mitohy hatrany ny fikaroham-baovao.
Ra Tax.