Nanao andiany marobe ireo dahalo nanafika tao Bemavo Beroroha. Niisa hatrany amin’ny 60 ireo malaso no niditra an-keriny tao an-tanàna ka ny 40 tamin’izy ireo nilanja basy avokoa. Tsy nisy sahy nanohitra ny mponina fa nifitsaka ary nanara-po tamin’izay tiany ireo mpanafika. Omby hatramin’ny 150 no nalain’izy ireo ka efa lasa lavitra ry zalahy vao roso tamin’ny fanarahan-dia ny fokonolona. Zandary 4 no nanampy ny mpanenjika ary nisy ny fifandonana. Nangotraka ny ady ary tsy nifampitsitsy mihitsy. Vokany, lehilahy 2 no maty nandritra ny fifamonoana. Mpanara-dia ny iray ary dahalo kosa ny iray tamin’ireo lavo ireo. Tafaverina taorian’izay ny omby miisa 10 fa ny 130 kosa lasan’ireo dahalo izay afaka nandositra. Mitohy ny fanarahan-dia ary tsy manaiky lembenana ny fokonolona. Ny mahagaga ny maro dia ny firongatry ny asan-dahalo na dia eo aza ny fepetra sy hetsika raisin’ny mpitandro filaminana. Maro ihany ireo dahalo efa voasambotra saingy toa vao mainka mitombo isa hatrany izy ireo isaka ny manafika.

Dom