Karazam-bibilava hafa kely antsoina hoe « serpent fantome » na bibilava lolo no hita kisendrasendra tany amin’ny valan-javaboahary voaaro any Ankarana, any amin’ny faritra Avaratra andrefan’ny nosy. Tamin’ny volana febroary taona 2014 no hitan’ ireo siantifika mpanao fikarohana izy ity saingy taorian’ny fandinihana lalina natao tamin’ny toetoetran’ity biby ity kosa no nahafantarana fa karazam-biby vaovao mbola tsy nanaovana fanadihadiana izy io. « Madagascarophis lolo » no anarana siantifika nomen’ireo mpandinika azy io, izay ivondroan’ireo ekipa mpikaroka ao amin’ny mozean’ny siansa voajanahary any Losiane sy ireo siantifika avy ao amin’ny oniverisitean’i Mahajanga. Tsy hadino koa  ireo mpikaroka avy amin’ny mozea amerikana izay mpahay ny tantara voajanahary. Efa navoaka ao amin’ny boky siantifika “Copea” daholo kosa ny fikarohana sy ny fandinihana rehetra efa natao tamin’ity biby ity. Ny mampiavaka azy kosa dia noho izy manana maso mitovy amin’ny mason-tsaka.  Miloko volon-davenona ny hodiny ary any anaty haram-baton’ny tsingy no ahitana azy.

S.A.