Fanovàna « Permis Biométrique » – Mampimenomeno ny mpanjifa
Efa nanomboka tamin’ny faran’ny volana jolay sy fiatombohan’ny volana aogositra lasa teo no miteraka resa-be ny fanovana ny fahazoan-dalana hamily fiara ho « permis biométrique ». Misy amin’ireo tompon’andraikitra izay azo antso an-tarobia no milaza fa ampanina ny milina fanamboarana azy io. Misy kosa nefa amin’ireo mpanjifa izay mijoro vavolombelona amin’ny tambazotram-piarahamonina toy ny “facebook” no miresaka fa mizotra tsara ny fangalana azy io. Ny any amin’ny faritra moa tsy lazaina intsony fa dia misy tamin’ireo efa nanamboatra tamin’ny volana aogositra no mbola tsy nahavoaray ny “permis-ny” hatramin’izao na dia efa nahavita tanteraka ny dingana sy ny fikarakarana taratasy rehetra ilaina amin’izany aza. Noho izany, mizarazara ihany ny sain’ireo mpanjifa izay mbola tsy nahavita fanovàna ny fahazoan-dalana hamily fiara ho “biométrique”. Misy ny milaza fa tsindry bokotra ataon’ireo mpanao risoriso izany hanerena ireo mpanjifa handoa vola ankolaka. Marihina kosa fa nandritra ny fotoana nanaovana ny fanadihadiana teny an-toerana dia mizotra soa aman-tsara ny fandraisana ireo olona hanova izany familian-dalana izany. Marihina fa 38 000 ariary ny vola aloa amin’izany, ankoatra ny dika mitovy ny fahazoan-dalana hamily sy ny vidina taratasy matevina na “carton chemise”, izay vidiana ao an-toerana 1000 ariary. Ny ankoatra izay dia risoriso mazava ho azy. Ny taratasy ilaina kosa dia ny dika mitovy ny kara-panondrom-pirenena, izay voamarin’ny solontenam-panjakana, fanamarinam-ponenana ary ny “permis” teo aloha. Tokony hoentina hatrany ny kara-panondro satria ilaina izany. Ary mila tonga maraina raha te ho afaka aloha.
Safidy Andrianina