Tsy mifidy toerana ary tsy misafidy olona tafihana intsony amin’izao fotoana izao ireo tontakely. Na lehilahy na vehivavy mantsy dia lasibatra avokoa ary na amin’ny alina na amin’ny antoandro be nanahary dia manatontosa hatrany ny asa ratsiny ry zalahy. Ankehitriny ihany koa dia tsy mifidy taona intsony ireo mpangarom-paosy sy mpanao sinto-mahery fa na dia mbola kely aza izy ireo dia efa sangany amin’izany asa ratsy izany. Vao haingana no namoaka izahay teto amin’ny gazety Madagascar matin fa zazalahy vao 12 taona monja no tra-tehaka nanendaka teny Ankorahotra teny. Omaly dia nampafantatra ny sefo fokontany eny 67ha Atsimo fa miverina mirongatra indray ny asa ratsin’ireo tonta kely eny amin’iny faritra iny. Somary nangingina izany tao ho ao ary lasa niverina ho faritra mena indray iny faritra iny amin’izao. « Tsy milamina indray ny eto amin’ny 67ha Atsimo amin’izao fotoana izao, eny fa na  eo aza ireo mpitandro filaminana mihaodihaody eny an-toerana amin’ ny alina. Na alina na antoandro dia manatanteraka izany ireo mpanao ratsy ireo. Ankehitriny ihany koa dia mirongatra ihany koa ny fangalarana batery-na fiara izay mitoby eny an-tsisin-dàlana. Tsy vitan’izany fa ny sinto-mahery koa efa mahazo vahana ety an-toerana », hoy ny sefo fokotany ao 67ha. Raha ny vaovao azo manko dia mpanendaka 3 lahy no efa voatifitr’ireo mpitandro filaminana tao anatin’ny roa volana izay.

Fa eny Anjanahary ihany koa dia itrangan’io zavatra io. Raha ny « pare-brise » sy ny « batterie » no lasibatr’ireo tontakely eny 67ha,  amin’ izao fotoana izao, ireo « jante » vita amin’ny « aluminium » indray no alain’ireo olon-dratsy amin’ireo fiara sendra mijanona eny amin’ ny sisin-dalana, eny fa na hatramin’ireo anaty garazy sy faritra mihidy aza. Amin’ny alina ireto olon-dratsy ireto no manatanteraka ny asa ratsiny ary manao andiany maromaro angamba ry zalahy araka ny filazan’ireo efa mponina eny an-toerana.

Ra Tax.