Lasa raharaham-pirenena ny tsy fandriam-pahalemana ankehitriny indrindra fa ny halatra omby sy ny vono olona, saika manerana ny nosy. Tena loza nihatra anefa ny tany amin’ny fokontany Tanandava, distrika Betroka satria dahalo dimy izay nitondra fitaovam-piadiana tsirairay avy no tonga nanafika ny tanàna, omaly tokony ho tamin’ny telo ora maraina.

Araka izany, nitsoaka kiririoka mba hanakorontanana sy hampitahorana ireo mponina izy ireo nandritra ny ora maromaro. Toerana akaiky ny fitobian’ny zandary moa ny any Tanandava, ka vantany vao nahare ilay sioka izy ireo avy hatrany dia niditra an-tsehatra ka nanenjika ireo dahalo ary nampilamina ny fiarahamonina.

Nisy ny fifandonana sy ny fifampitifirana nifanaovan’izy ireo ka vokatr’izany dia dahalo iray no maty, ny roa amin’izy ireo no voasambotra ary ny roa ambiny kosa tafatsoaka lavitra. Marihina etoana fa tsy nisy na omby iray aza lasan’izy ireo tao amin’io fokontany io.

Ny Kolonely Ranaivoarison Théodule izay lehiben’ny  tafika eo Anosy moa dia nilaza fa misy ary hipaka manerana ny nosy ny fiaraha-miasa eo amin’ny mpiray dina sy ny mpitandro filaminana, ahafahan’ireo mponina miaro tena rehefa tratra ny fanafihana toa ireny.

Anna Ra.