Miha mahazo vahana indray ny trafikana toaka gasy eto an-drenivohitra. Raha ny vaovao azo manko dia efa misy mpaninjara manokana izy ireny eto ary efa misy vidiny mazava tsara. Miafina hatrany moa ireto mpivarotra ireto ary tsy maintsy amin’ny lalam-barotra maizina ihany koa no hivarotan’izy ireo izany. Ny Talata lasa teo dia nahatratrarana « bidon » 60 isa (1200 litatra) feno toaka gasy tao anatina fiara mazda iray an’ny Kaoperativa Kofifiro avy any Toamasina teny Ambohimangakely, tokony ho tamin’ny folo ora maraina teo. Zandary tao amin’ny Borigadin’Ambohimangakely no nahare antso avy tany amin’ny namany avy any amin’ny toby hafa fa misy fiara mitatitra toaka voarara eny an-toerana. Taorian’ny sakana napetrak’ireo mpitandro filaminana no nahatratrarana ilay fiara izay tena nitatitra toaka tokoa nefa tsy nahazo alalana. Raha ny loharanom-baovao voaray dia efa nafenina tao anaty labasy misarona tsara mba tsy hahenoana ny fofony ireo zava-mahadomelina  sarona ireo. Raha ny vaovao voaray hatrany dia mpivarotra monina ao amin’ny fokontany Masinandriana, ao aminn’ny kaominina Mahitsy, no tompon’ireo entana ireo izay tratra tao anaty fiara. Notazomina ilay tompon’ny toaka sy ilay mpamily ka rehefa vita ny famotorana dia natolotra ny fampanoavana ny talata lasa teo ihany izy ireo. Nahazo fahafahana vonjy maika  ilay mpamily fa ilay tompon’ny entana kosa naiditra am-ponja vonjy maika. Nodorana teo imason’ny olom-panjakana tao an-toerana ireto toaka ireto. Araka ny lalàna misy eto amintsika dia Ar 10 000 isaka ny litatra ny lamandy aloan’ny olona tratra amin’ny fanondranana antsokosoko ny toaka voarara.

Ra Tax.