Olona am-polony indray no nosamborin’ny zandary fa voarohirohy ho tambajotra mpangalatra omby, ny 27 sy 28 Septambra lasa teo, tany Talata-Volonondry. Maromaro izy ireo no mivondrona amin’izany ary mitsinjara ho ekipa roa miavaka tsara. Ao ny mpangalatra ny omby, ny sasany kosa mitady mpivaro-kena handray ny halatra. Araka ny nambaran’ny Kolonely Zafisambatra Ravoavy, izay kaomandin’ny zandarimariam-pirenena dia ny dian-tsoritr’ireo biby ireo teny an-dalana no narahana ka nahatratrarana ireo voarihirohy ho nanao ny halatra. Tratra tamin’izany ny omby miisa dimy izay nafenina tao amin’ny tranon’ny iray amin’izy ireo. Marihina fa tamin’ny herinandro no nahavery ireo omby ireo. Efa eo am-pielantanan’ny mpitandro filaminana ny raharaha ary mitohy hatrany ny fanadihadiana.

Anna R.