Ny talata 27 septambra lasa teo, tokony ho tamin’ny 7 ora sy fahefany hariva no nitrangana fanafihana goavana tany Ampisikinana, faritra Haute Matsiatra, fokontany Ambodivohitra, Kaominina ambanivohitr’Ikalamavony. Tokantrano iray no nataon’ireo jiolahy am-polony lasibatra rehefa avy nopitsohin’izy ireo ny varavarana. Vantany vao tafiditra ny trano izy ireo dia nanambana tamin’ny basy avy hatrany ny iray ka nandidy ny tompon-trano hamoaka ny zava-tsarobidy rehetra. Rehefa tsy nety nanome izany ity raim-pianakaviana dia notifiriny. Ny vady aman-janany kosa tratran’ny tsy akihetsika ka tsy afa-niantso vonjeo akory. Araka ny vaovao voaray dia vola mitentina 4 400 000 Ariary, finday efatra, lecteur Dvd iray ary volamena 10 grama no lasan’ireo olon-dratsy. Nakorontany ka natsipitsipin’izy ireo avokoa ny entana tao an-trano alohan’ny hialany tao. Nizotra nianatsimo ny dian’izy ireo. Rehefa lasa ireo jiolahy izay vao nentina teny amin’ny toeram-pitsaboana ilay raim-pianakaviana, noho ny ratra nahazo azy. Taorian’izay ihany koa izy ireo vao nampandre ny mpitandro filaminana ao amin’ny borigadin’ Ikalamavony, izay nanao ny fanarahan-dia saingy tsy tratra intsony ireo dahalo. Mitohy ny fanadihadiana sy ny fikarohana ireo olon-dratsy.

Anna Ra.