Mizana miisa 30 no voamarina fa tsy manara-dalàna tao amin’ny tsenan’i Mahabibo ao Mahajanga. Nidina ifotony nanao ny fanaraha-maso ny sampan-draharaham-paritry ny varotra noho ny fitarainan’ny mponina. Tratra tamin’izany ireo mpivarotra mangala-danja amin’ny fampiasana fitaovana tsy manara-penitra na ihany koa raha tsorina dia efa namboarina hitanila. Ny 29 septambra lasa teo no nanatanterahana izany niaraka tamin’ny tambazotran’ny mpiaro ny zon’ny mpanjifa. Efa fanao matetika ny fanaraha-maso toy izao nefa dia mbola am-polony ihany ireo tratra. Marihina fa azo sokajiana ho anisan’ny halatra sy fisolokiana ny fampiasana mizana mitanila mba hahakely fatra ny entana amidy amin’ny mpanjifa. Ny ao Mahajanga aloha izao sarona izao fa inoana fa mbola ratsy kokoa noho izany ny eto Antananarivo. Ankoatra ny mpivarotra amin’ny enta-madinika mantsy dia maro loatra ireo mpivarotra tsy ara-dalàna sy mandehandeha etsy sy eroa mampiasa karazana mizana izay tsy fantatra marina ny fomba fampiasana azy. Ireo mpivarotra legioma sy voankazo no tena tsy atokisan’ny mpanjifa satria izay voarain’ny tanan’izy ireo dia toa lazainy ho marin-danja avokoa. Andrasana noho izany ny fidinan’ny mpanara-maso avy ao amin’ny minisiteran’ny varotra hijery ny mizàna eny an-tsena satria sady efa lafo ny vidin’entana no mbola mangala-danja ihany koa ireo mpivarotra.

Dom