Tsy vitan’ny tompon’andraikitra any an-toerana intsony fa tsy maintsy nandefasana miaramila hanampy ny mpitandro filaminana any Ambatofinandrahana. Tafika miisa 60 lahy no nalefa any an-toerana hanampy ny zandary sy ny fokonolona hiady amin’ny asan-dahalo. Nirongatra be mantsy ny halatr’omby tany amin’ity distrika ity tato anatin’ny 2 vola mahery izay. Lazain’ny tompon’andraikitra ifotony fa taorian’ny fametrahana ny hetsika fitandroana fahalemana tany an-toeran-kafa dia nikisaka any Ambatofinandrahana ireo dahalo. Mandray ny andraikiny ihany ny zandary sy ny fokonolona ary ny kalaony saingy tsy mitovy ny hery sy ny fitaovam-piadiana ka matetika miala maina. Efa sahy manafika amin’ny antoandro be nanahary ireo malaso ary manao andiany maro hatramin’ny 60 sy 80 lahy ary mirongo fitaovam-piadiana mahery vaika izy ireo. Faramparany teo izao dia omby miisa 44 no  nalain’izy ireo tamin’ny 1 ora tolakandro tao Betaimboraka. Nanao ny fanarahan-dia ny vahoaka sy ny zandary saingy omby 20 ihany no tafaverina. Zava-dehibe, noho izany, ny fahatongavan’ireo vata-miaramila miisa 60 ireo ary andrandrain’ny vahoaka mihitsy ny hametrahana maharitra azy ireo any mba ho tena tadroka ho aron’ny vozona sy hiaro ny vahoaka manoloana ny dahalo izay efa nosokajiana ho fahavalom-pirenena.

Dom