Nisokatra tamin’ny fomba ofisialy omaly 4 Oktobra ary hifarana rahampitso Alakamisy ny atrikasa entina hamolavolana ny rafi-pampianarana eto Madagasikara. Atao any Ihosy io fivoriana io ary solontena maromaro isaka ny faritra 22 no tonga manatrika izany any an-toerana. Lohahevitra maromaro no dinihina mandritra izany, izay atao amin’ny endrika fifanakalozana ka andraisan’ireo  solontena tsirairay anjara. Izao no atao dia mba hahafahana manarina ny lesoka sy manatsara ny fampianarana amin’ny ho avy ary koa hanomezana  fahafaham-po ny mpampianatra sy ny mpianatra. Ao ny mikasika ny fomba fampitana sy ny fanatsarana ny fandaharam-pianarana amin’ny ankapobeny, ao ihany koa ny fomba famolavolana laza adina havoaka amin’ny fanadinam-panjakana. Tsy hadino ny fandinihana ny rafitra Licence – Master – Doctorat (Lmd) sy ireo maro samihafa tsy voatanisa, izay fantatra fa manan-danja lehibe ho an’ny mpianatra. Ny fahafahana manitsy ny fomba fampianarana amin’ny ankapobeny mba hifanaraka amin’ny filàn’ny mpianatra malagasy no tanjon’ity atrikasa ity. Eo ihany koa ny mba tsy hahatonga azy ireo handà fianarana fa hahay hanome lanja ny fianarana, izay antoky ny  hoaviny iray manontolo. Fantatra mantsy fa antony tsy ahavitan’ny ankamaroan’ny ankizy fianarana hatramin’ny farany ny hakamoana noho ny tsy fahampian’ny enti-manana sy ny fahamaikana hahazo vola noho ny fakam-panahy maro samihafa.

Anna Ra.