Voatifitra ny 1, voarasarasan’ny sabatra ny 3 hafa ary naratra mafy ireo dahalo 4 mirahalahy nanafika tao Ivohibe. Mbola afaka nandositra ihany anefa izy ireo. Voasambotry ny zandary kosa  ilay tena lehiben’ireo malaso na dia nanao izay ho afany mba hialana ny mpitandro filaminana aza. Miisa 20 ireo dahalo no nanafika ny tanàna ka omby 40 no saika havoakan’izy ireo tamin’izany. Tsikaritry ny andrimasom-pokonolona anefa izany ka raikitra ny antsoantso. Nitsoaka ireo malaso nefa tsy nandeha lavitra fa nandroba mpivarotra indray avy eo. Lasan’izy ireo tamin’izany ny entam-barotra samihafa miampy vola mitentina 1 tapitrisa Ariary. Tsy nanaiky nolembenana ny tompon-trano sy  ny mpiray tanàna izay nampian’ny mpitandro filaminana. Naharitra 45mn ny fifandonana izay nisian’ny fifampitifirana tsy ankiato ka  niafara tamin’ny fifanandrinana mivantana tamin’ny lefona sy ny antsilava.

Lamina efa maty paika teo amin’ny mpitandro filaminana sy ny fokonolona izay nampiseho firaisankina no nahazoana io vokatra io. Hatramin’ny nametrahana ny dinabe sy ny kalaony dia lasa tsy manaiky lembenana fa sahy miady sy mifampiaro ny vahoaka manoloana ny asan-dahalo. Ireto farany dia tsy mahavita mampiseho habibiana akory rehefa sendran’ny akanga maro tsy vakin’amboa.

Dom