Tsy mitsahatra mirongatra ny halatr’omby any amin’iny faritra Melaky iny, hany ka dia mandry tsy lavo loha ireo mponina any an-toerana. Ny marainan’ny 06 oktobra lasa teo mantsy, tokony ho tamin’ny 05 ora sy sasany maraina dia notafihan’ny dahalo tao amin’ny fokontany Marotsialeha, distrika Ambatomainty, faritra Melaky. Jiolahy 13 nitondra basim-borona tsirairay avy no tonga masiaka tao amin’io toerana io ka nangalatra omby tao amina tokantrano iray. Nirefodrefotra ny basy tamin’ny fandalovan’ireo dahalo tao an-tanàna ka tsy nisy sahy nivoaka nanohitra azy ireo ny mponina, indrindra fa ny nifanolo-bodirindrina tamin’ity tokantrano voatafika ity. Vokatr’izany dia omby miisa 82 no indray voaroba. Rehefa lasa ireo olon-dratsy vao sahy nampandre ny mpitandro filaminana ny fokonolona. Zandary telo avy ao Marotsialeha no nanao ny fanarahan-dia ary zandary maromaro avy ao Ankingabe no nanao ny fiambenana ny tanàna. Mbola mitohy ny fanadihadiana amin’izao fotoana izao.

Anna Ra.