Hafa kely ny fomba nanatanterahan’ny andian-dahalo ny fanafihana tao Anosiarivo Ankasibe any Soavinandriana Itasy. Notohanan’izy ireo ny varavaran’ny trano rehetra tao an-tanàna mba tsy hahafahan’ny mponina hivoaka. Nahery fiavy ireo mpanafika satria tsy nitsaitsaika namely tampoka fa avy hatrany dia nanapoaka basy nirefodrefotra vantany vao tonga. Tokantrano iray no lasibatra tamin’izany ka  very ny fitaovana elektronika toy ny fahitalavitra fisaka, lektera, fanamafisam-peo sy vola 2 hetsy ariary.  Tsy nisy afa-nihetsika nanohitra ireo voatafika ny iray tanàna fa dia nihainohaino ny zava-nisy fotsiny. Rehefa lasa ireo jiolahy vao nampandrenesina ny zandary izay manao ny famotorana amin’izao fotoana izao. Ankoatra ny maha tsy fandriam-pahalemana azy dia efa tena asa fampihorohoroana mihitsy ity nitranga ity. Herisetra sy fampisehoan-kery ary fampitahorana mantsy no fomba nanatanterahan’izy ireo ny fanafihana.

Dom