Saika naharenesana fatin’olona nisy nanary etsy sy eroa tato ho ato amin’ny faritra maro eto Madagasikara, toy izay nitranga tany Matsabory, kaominina ambanivohitr’Ambilobe, faritra Diana.  Vehivavy iray 48 taona no hita faty tao an-tranony ny 11 oktobra lasa teo. Tamin’ny 10 ora maraina tany ho any no nisy nahita ny razana raha toa ka sendra niditra tao an-trano ny havany. Mpampianatra any amin’ny sekoly tsy miankina iray moa izy ity ary rehefa natao ny fizahana dia fantatra fa efa ho iray volana mahery no nahafaty azy io satria toa manodidina an’izay no nahitan’ny mpiara-belona sy ny mpianany azy farany. Tsy re sy tsy fantatra intsony ny nisy azy taorian’izay. Ny ankamaroan’ny fananany koa dia efa saika fongana avokoa. Raha ny fizahana farany nataon’ny mpitsabo azy dia voamarina fa nisy namono izy io. Rehefa nanao ny famotorana ny mpitandro  filaminana dia fantatra fa lehilahy roa no voarohirohy ho nahavanona izao loza izao. Hisorohana  ny fitsaram-bahoaka nefa dia nalefa any Antsiranana avy hatrany ireo roalahy ireo. Misokatra araka izany ny fanadihadiana ny amin’ny nahafaty marina ity ramatoa ity ka ny mpitandro ny filaminana ao Ambilobe no manao ny famotorana.

Anna Ra.