Efa iray volana izay no nisian’ny fahatapahan-jiro tany Antsohihy. Niovaova hatrany ny antony naroson’ny Jirama momba ny fahatapahan-jiro lava reny. Olana tekinika teo amin’ny milina mpamokatra herinaratra no voalaza  tany am-boalohany, nivadika ho resaka solika indray izany taty aoriana. Mitaraina ny mponina, maharitra 15 ora eo mantsy ny fahatapahan-jiro isan’andro, manomboka amin’ny 4 ora tolakandro izany ary tsy miverina indray raha tsy efa maraina. Tsy vitan’izay ihany anefa fa mbola misy fiatoana eo amin’ny 4 ora eo indray mandritry ny andro izay miovaova araka ny fokontany ny fitrangany. Raha atambtra ary dia eo amin’ny adiny 4 eo ihany no tena misy herinaratra any an-toerana. Sahirana tokoa ny mponina noho io  fahatapahan-jiro diso tafahoatra io satria na ny asa fitadiavana na ny asa tokantrano dia samy tsy mandeha araka ny tokony ho izy. Tsy nahazoana valin-teny mahafa-po anefa ny tompon’andraikitra ny amin’izay olana izay ka mbola tsy fantatra mihitsy ny fotoana mety hiverenan’ny jiro amin’ny tokony ho izy indray.

Ny Tsiky R.