Toerana efa malaza ratsy amin’ny asan-dahalo sy ny halatr’omby ny kaominina ambanivohitry Malaimbandy, anisan’ireo faritra voasokajy ho faritra mena mihitsy raha izy. Malaso 2 lahy indray, izay fantatra amin’ny anarana hoe : Soaraza sy Rasiso, no nanafika tao Maroamby sy Beanana, fokontany Androtsy tamin’ny 11 oktobra lasa teo tokony ho tamin’ny 4 ora tolakandro tany ho any. Ny trano fonenan-dRamatoa Hanta, no lasibatra tamin’izany.  Nirongo basy lava “calibre 12” sy antsy ireo mpanafika ary omby miisa 8 no azon’izy ireo tamin’izany.  Mateti-pitranga amin’ny faritra maro ny fanafihan-dahalo mitam-piadiana mahery vaika tahaka izao. Tsy nionona tamin’ireo omby anefa ireo olon-dratsy ireo fa mbola naka an-keriny an-dRamatoa Hanta tompon’omby ihany koa, mba hatao takalon’aina.  Fotoana fohy taorian’izay anefa dia niroso tamin’ny fanarahan-dia ireo dahalo ny zandary avy tao amin’ny tobim-paritra Malaimbandy ary narahin’ireo fokonolona.  Ora vitsy taty aoriana dia tratra ireo dahalo ary nisy ny fifandonana teo amin’ireto farany sy ireo mpitandro ny filaminana.  Lavon’ny bala tamin’izany i Rasiso, ary azo sambo-belona kosa i Soaraza. Tsy nisy ny naratra kosa ny avy amin’ny zandary. Avotra soa aman-tsara ihany koa Ramatoa Hanta ary efa tafaverina aminy ireo omby nangalarin’ireo malaso.  Efa eny am-pelatanan’ireo zandary ireo basy nampiasain’ireo olon-dratsy.  Natao famotorana tany amin’ny tobin’ny zandary i Soazara mba ahafantarana ny fiavian’ireo basy ireo saingy kely ny fanantenana ny amin’ny mety ho fitohizan’ny fanadihadiana.  Haingam-piasa ireo zandary ary izany no anisan’ny nahatontosana ity fanavotana ity. Tsy hita aloha hatreto izay fepetra mety horaisina hiadiana sy hanafoanana tanteraka ny asan-dahalo any amin’iny faritra iny, ny velaran-tany tokony harovana dia ngeza tokoa ka tsy mahasahana izany ny isan’ny mpitandro filaminana any an-toerana.

Ny Tsiky R.